لغز محير: يعني ايه كلمة موزه؟

بسم الله الرحمن الرحيم 

كلنا طبعا عارفين كلمة موزه، وللناس اللي ميعرفوش كلمة موزه "وفي الغالب هيكونوا فوق الـ 40 ربيعا" علشان محدش يزعل

كلمة موزه كلمة سفله كده يا فندم بتتقال من ولد لبنت لما يحب يعاكسها .. وغالبا بتكون معاكسه هايفه وتافهه زيه :D

ويقول الواد وهو ضارب النضاره ام 7 جنيه ونص اللي جايبها من اي مصيبه وهو ماشي زي "البوبي" ورا بنت في الشارع

ايه يا موزه .. بس كده وكده الاستاذ يبقى عاكس .. "ويمشي يتفشخر" وسط التافهيين اللي زيه ويقولهم اما انا عاكست حتة دين "بت" النهارده

انما ايه .. صاروخ ياريس
لكن اللغز الذي حير الجماهير هو اصل ومعنى كلمة موزه .. الكلمه دي جت منين

نرجع لأصل كلمة موزه بقى اللي محدش عمره اخدت باله منها .. 

كان زمان ايام الاحتلال تقريبا في بداية التلاتينات اللغه الفرنسيه "الفرنش -.-" منتشره لدجة إن "محمد بيك عبدالوهاب" كان بيتكلم بيها في افلامه وعلى سرميكا كده .. كانت لغه الطبقه الراقيه "زي ما دلؤتي الإنجلش لغه الطبقه الراقيه"

المهم .. اياميها كانوا بينادوا على البت اللي لسه مش اتجوزت "Madmozil" " بضم الأف وهي المفروض تعني كلمة انسه بالفرنسيه

لكن لو جينا دورنا في معجم الفرنسيه هنلاقي إن مفيش كلمة اسمها "Madmozil" في اللغه كلها

ولو جربت حضرتك تترجمها في جوجل للترجمه من الفرنسيه إلى العربيه او الانجليزيه ايمها تفضل

هتلاقي انه يتعذر الترجمه او يطلعلك نفس الكلمه "دليل على انه ملهاش ترجمه"

طيب كلمة "Madmozil" دي جات منين؟ .. الكلمه دي اصلها كلمة Mademoiselle وهي تعني حرفيا "الانسه" وتم تحريفها إلى ان وصلت لمصر وبقت Madmozil .. طبعا الطبقه الفقيره من عامه الشعب "اللي هو انا وغيري اللي زيي" حابوا يقلدوا الاغنيا .. فالجهل اراد في اواخر السبعينيات اوائل الثمانينات من القرن الماضي ان تتحول Madmozil إلى مزمزيل (واستحاله اكتبها بحروف إنجليزيه علشان محدش يتريق عليا)

وكعاده الشعب المصري "مبيحبش يخلي حاجه على حالها"
او كعاده شبابنا "المفتكس" اللي لازم يحرف ويحور ويجدد تاريخه كل اسبوع وهو قاعد على القهوه بيضرب الشيشه التفاح بتاعته
فاختصر كلمه مزمزيل إلى حرفين فقط وبقت "موز" بس "مز او موز الاختلاف في النطق فقط" كانت كلمة "ناشفه" ومكنش فيها تاء التأنيس بتاعت "تانيه ابتدائي دي" فبالفهلوه كده محتاجه ايه الكلمه علشان تنادى بها البنات؟، عليك نوور تاء التأنيس فاكرها؟، ومن هنا بقى تحولت إلى موزه .. ومن هنا ايها الساده الكرام تم تحريف وقتل الكلمه لتصبح في نهاية الامر موزه .. كلمة مكونه من اربع حروف

والسلام ختام لأمي في البلد
التدوينه دي اجتهاد وفهلوا شخصيه مني "واي نقل تعسفي من غير ذكر المصدر" انا مسامح فيه بس الدعاء الله يخليك