ثروات مصر في جيوب حزب الحكومة .. افترائات محتاجه ردود

 بسم الله الرحمن الرحيم

(والله بقيت بتردد اكتبها ليقولوا عليا "اخوانجي" )

 اللي جاي ده مقدمه (لو عاوز تفوتها فوتها عادي)

اولا انا مش ناوي اقلب نظام الحكم، والسيد مبارك زي الفل والله وخلاص انا بعد ما قولت اني عاوزه يمشي، رجعت وقولت نستني ونشوف وكلها لستمبر الجاي .. وربنا يستر!

لما كتبت التدوينه دي قالوا عليا مهيج ومبحبش البلد .. وعميل وخاين ومبفهمش واتقال عليا كتير من من هم مؤيدين لبقاء الريس مبارك

من ضمنهم حد قالي انتا عارف ان الراجل ده هو اللي حامينا :)

السيد الرئيس محمد حسني مبارك هو اللي حامينا؟ يا ساتر يارب وده كفر بالله ولا الراجل ده خارق مثلا؟

حد تاني قالي الراجل ده الدول التانيه بتحترمه

امممممم .. طيب حد يقولي"مستر" اوباما "الاسود" الناس ازاي احترمه في بلده وخارج بلده؟

انا اقولكم على السر اللي انتوا نسيتوه (رغم اني باكد اني والله خلاص اقتنعت وهستنى لحد ستمبر ويوم ما يخرج هقوله تشكر ياريس)

السر بقى في المعاهدات الدوليه والاتفاقات ووضع مصر زات نفسها :)

يعني لو جه "فلان، او علان" هيحصل نفس اللي بيحصل معاه ويمكن اكتر لان لو قولنا ان اللي بيحترم مبارك بيحترمه علشان مصلحته مع مصر

هنقول إن اللي جاي مش هيكون حد لسه كرهه زي بشار الاسد "مثلا" وبكده علاقتنا هتتصلح مع سوريا

نرجع مرجعنا للحاجات اللي محتاجه رد

اولا التدوينه دي اتكتب يوم السبت 5/1/2011

يوم الجمعه بقى "جمعه الرحيل" اللي وافقت يوم 4/1/2044 لو حد اتفرج على قناة الحياه والمقابله بتاعت 

النائب السابق مصطفى بكري

يعني مش على مسؤليتي انا

طبعا انا مش فاكر الارقام لكن فاكر الاسماء

السيد احمد عز "امين لجنة السياسات في الحزب الوطني السابق" = 60 مليار دولار

السيد حبيب العدلي "وزير الداخليه السابق" 200 مليار

السيد جمال مبارك عنده طياره من مصروفه

السيد رشيد محمد رشيد 15 مليار (مش متاكد اذا كان الرقم دقيق او نسيت اللي قاله بكري)

ده غير السيد المغربي "وزير الاسكان السابق" كذا مليار برده (مش فاكر الرقم) ولا شركة "بالم هيلز دي ظروفها ايه؟"

ثروة السيد محمد حسني مبارك .. 130 مليار دولار

اولا انا مش بعيب او بشكك في نزاهة الناس اللي اتذكر اسمها فوق دول، بس انا عاوز اعرف "بما اني مصري معلش"

عاوز اعرف الناس دي جابت الثروات دي منين "إن صحة الاقاويل"

ثانيا .. هي دي الناس اللي كانت ولازالت مسكه مصر + النائب السابق مصطفى بكري بيقول انه هناك المزيد

ياترى يا سيد بطري غالي "وزير الماليه السابق" ثروتك كاااام :)؟

السيد حسين سالم "رجل اعمال ومقرب جدا من سيادة الرئيس مبارك" قالوا انه سافر بره مصر

قولنا خايف على ثروته مهو رجل اعمال واكيد له اعداء بقى

اتصل بعمرو اديب في قناة الحياة 2 في برنامج مباشر مع عمرو اديب

المهم اتكلم وقال انه في البلد وبتاع، عمرو شك اتصل بيه لقى الانسر ماشين "او جهاز الرد الآلي" بيقول انه مش موجود وسايب عنوانه اللي في جينيف "سوسيرا"، وكان قبلها ناس كلموا "عمرو اديب برده مش انا اكيد" وقالوله انهم شافوه في جينيف برده

طيب ايه اللي دفع السيد حسين سالم انه يكذب؟

وعاوزنا نثق ونصبر ونحترم .. ده لو حتى في فعلا مؤمرات خارجيه فالمحرك الاساسي بتاعها الحكومه بالنظام واللي فيه مش الشعب اللي اداهم الفرصه

"كلمة اخيره"

يمكن يكون في خونه ومخططات ومؤمرات داخليه وخارجيه وسودانيه وماليزيه كمان

بس اللي انا متاكد منه ان زي ما بيقولوا في مؤمرات متاكد ان في ناس في التحرير لحد دلؤتي مصريين بجد ومش عاوزين حاجه غير انهم يعملوا حاجه للبلد دي بنيه سليمه

وانا ازعم اني واحد منهم

حق الرد مكفول لاي حد ذكر اسمه في التدوينه دي "علشان بتوع امن الدوله بس ربنا يبعدنا عنهم"